Picnic Dansant

Thursday, 28 October 2010 15:29

E anja aki cuenta su evento maximo di recauda fondo lo tuma lugar diadomingo 7 di November di 11:00 am te 4:00 pm na Renaissance center y lo ta al estilo picnic. Hende muhernan por bisti carson estilo piscado, sombre hancho y cabayeronan por bisti Bermuda cu poloshirt of guayabera – estilo relax.  Entrada ta 125 florin y ta obtenibel na Maggy’s, Surprise, Giselle Boutique y serca tur miembro di Quota.

Lo sirbi un sabroso lunch crioyo, mientras e publico por deleitanan mes y baila riba tononan alegre di Rincon Boyzz y Tsunami.

Lo tin cantidad di door prize atractivo, incluyendo un ticket cu Tiara Air pa un di nan destinacionan, week-end stay na hotel, cena na restaurant pa dos persona, certificado di regalo, cellular, etc.

Tambe lo tin atrobe e ‘silent auction’, esta e subasta silencioso entre otro di piezanan di arte di artistanan local manera Grace Ashruf, Harold Bronswinkel, Efraim Britten, Yahaira Croes, Osyth Henriquez, botter di binja exclusive, gift set y posters specialmente autografiá pa e occasion aki door di nos orguyo Arubiano, Dr Edward Cheung, un di e ingenieronan principal di Nasa su Hubble telescope project y disenjador di nan ARUBA box cu a bai den espacio.

Manera custumber, tur fondo recauda lo wordu duna back na comunidad via e diferente organizacionan cu ta traha na bienester di esnan cu problema di oido of habla, hende muher y muchanan den dificultad y otro proyectonan y programanan di conscienticacion relaciona cu e gruponan aki.

Rina Gonzalez,   
Presidente 2010-2011  
Quota International of Aruba 

Mena Laclé,
President Comision di Recauda Fondo 2010
Quota International of Aruba